გალაკტიონ ტაბიძე

წამყე ბეთანიისკენ!

წამყე ბეთანიისკენ! იქ, სადღაცა, შორიახლო
იყო ორბელიანების
            და ირაკლის სამოსახლო.

გზაზე, სადაც ცაცხვებია და მუხნარი უმეტესი,
არსად ქვეყნად არ მინახავს
        ადგილები უკეთესი!

ადგილები ასე მშვენი ვარდისაგან, იისაგან...
სანადირო ადგილები
            წამყე ბეთანიისაკენ!

მოდი, სადმე უდაბური ვპოვოთ კუთხე ქედმომაღლო,
გადმოვხედოთ მაღლით თბილისს -
        მე აქ უნდა დავესახლო!

წამყე ბეთანიისკენ! იქ, სადღაცა, შორიახლო
იყო ორბელიანების
            და ირაკლის სამოსახლო.

1947